مُختلف ٻيٽن جو هيءُ ميڙ ايٽلانٽڪ وڏي سمنڊجي ڏکڻ طرف موجود آهي. انهن ٻيٽن تي برطانيا ، اسپين ۽ ارجنٽينا جي وچ ۾ سدائين تڪرار رهيو آهي. جڏهن برطانيا، هن علائقي کي قبضي هيٺ آندو هيو، ته ان وقت هنن ٻيٽن تي ٽنهي ملڪن وارثيءَ جي دعوي ڪئي هئي . ان کانپوءِ برطانيا 1833ع ۾ اڪيلي سِرِ ٻيٽن کي پنهنجي قبضي هيٺ ڪيو. 1820ع ۾ جڏهن ارجنٽينا (جيڪو اڳ ۾ اسپين جي قبضي هيٺ هيو) آزادي ماڻي ، ته اُن علائقي مٿان پنهنجو جاگرافيائي حق گهريو. برطانيا طرفان اهڙي دعويٰ مڃڻ کان انڪار ڪرڻ تي، ارجنٽينا اپريل 1982ع ۾ بنا ڪنهن چتاءَ جي 14،000 فوجين جي طاقت سان ٻيٽن کي طاقت جي زور تي قبضو ڪيو. ان جي جواب ۾ برطانيا گڏيل قومن جي پُٺڀرائيءَ سان ٻيٽن کي فوجي ڪاروائيءَ ذريعي واپس وٺڻ ۾ ڪامياب ٿيو. اِن سڄي معاملي دوران ٻين ملڪن کي اهو ئي تاثر مليو ته برطانيا جا دُنيا ۾ جتي به قبضا آهن ، انهن کي برقرار رکڻ لاءِ برطانيا ۾ گهربل طاقت نه رهي آهي. اِن گهوٽالي دوران تڏهوڪي برطانيائي وزيراعظم، مسز مارگريٽ ٿيچر جي سخت موقف ۽ ويڙهاند واري حڪمت عمليءَ کي مُلڪ اندر وڏي هٿي ملي ۽ کيس ”فولادي خاتون“ (Iron Lady) جي خطاب سان ياد ڪيو ويو